SEGUNDA QUINCENA DA FROITA NA ESCOLA

Do luns 16 ao venres 27 de abril gozamos no CEIP Valle-Inclán da segunda quincena da "Froita na Escola" con saborosas novidades. Nas xa saudables merendas dos nosos alumnos tentamos introducir novos sabores e texturas que case sempre supoñen agradables sorpresas.

Na primeira semana a protagonista foi a piña, pero non a piña de lata que case todos coñecemos, senón unha auténtica piña natural no seu perfecto punto de maduración, que resultou un auténtico éxito.

Os amorodos non foron novidade porque os nosos alumnos son os "fans" número 1 desta saborosa froita.

O mango foi a novidade máis exótica da quincena, e todos lle intentaron atopar semellanzas con outras froitas... E ao final decidiron que o mango sabe a mango. Moi bo por certo.

E para rematar as novidades da quincena, adiantamos a tempada da sandía e do melón cuns riquísimos froitos no seu punto.

Para despedir esta fantástica experiencia da "Froita na Escola", gastamos un poquiño da enerxía saudable que temos acumulada xogando unha partida ao "Picnic Enredado", unha divertida variante do "Twister" na que temos que coñecer moi ben os diferentes tipos de alimentos.

E como relaxante broche final, os alumnos de primaria compartiron cos seus compañeiros de infantil uns preciosos poemas do noso paisano Xoán Carlos Domínguez Alberte, que no seu último libro "Versos para conversar" dedica unhas belas liñas aos froitos da nosa terra.

Se queredes ver a galería da nosa segunda quincena da froita, premede aquí.

VISITA A "O REXO"

O venres 6 de abril visitamos as instalacións de "O Rexo", sitas nunha preciosa paraxe moi preto de Allariz. "O Rexo" e un Ecoespazo multidisciplinar no que ocio, formación e cultura van da man. Neste lugar podemos coñecer a elaboración do queixo de ovella contemplando todo o proceso, desde o animal ao produto final, e podemos aprender sobre a natureza e as labores gandeiras, no Centro de Educación e na granxa-escola. E sobre todo podemos contemplar un lugar único e sostible, que incluso conta coa súa propia central hidroeléctrica, perfectamente integrado na magnífica obra escultórica e pictórica "Pedras e Árbores" do artista Agustín Ibarrola.

Comezamos a nosa viaxe polo mundo do queixo visitando as instalacións de muxido. Aquí nos explican el ordenado proceso para obter o leite das ovellas e o tanque onde a gardamos fresquiña...

Deseguido imos visitar as verdadeiras protagonistas do queixo, neste caso ás crías de ovella que crecen ben coidadas e alimentadas a resgardo da choiva de hoxe. Alí aprendemos como é o desenvolvemento das pequenas ovellas e que atencións necesitan. Parece que fixeron novos amigos...

A continuación coñecemos a elaboración do saboroso queixo: a máquina que nos axuda a bater o leite, os produtos necesarios, como o prensamos e lle damos forma e o proceso de maduración.

Finalmente, e xa con fame, chegou a hora de probar o produto final ben madurado e coidadosamente cortado (o segredo deste queixo). Todos os nenos cataron e á maioría gustoulles, todo un éxito!

Unha saída fantástica na que aprendemos a elaborar queixo artesán e probamos novos sabores ademáis de coñecer boa xente e paisaxes inesquecibles.

Se queredes ver a galería completa da nosa visita a "O Rexo", premede aquí